十個住荷蘭嘅理由
（更多歐洲/荷蘭生活資訊，立即到https://www.patreon.com/allyblahblah）
1. 治安好
世界上應該好難搵到100%安全嘅地方，相比起唔少發達國家（如英美等地），荷蘭整體罪案率低，監倉空置率高，有啲市政府更會將監獄改造成房屋添！
2. 普遍英語程度高
語言溝通係一般人移居海外嘅重要考慮因素。荷蘭人普遍英文程度高，有啲人更自稱英文比 native speaker 更好。事實上，大部份本地人可以輕易轉做英文溝通，連平時喺街市買餸都冇問題！
3. 普遍教育程度高
除咗英文好，唔少荷蘭人教育程度非常高。「閑閑哋都有個碩士學位」。一嚟係因為當地高等教育費用低、質素高，二來唔少大公司早已將入職門檻提高至碩士畢業。
4. 到歐洲各國超方便
無論係本地定係國際交通，荷蘭呢方面都做得非常唔錯。如果上到鄰近嘅英、法、比、德等國家，坐飛機/火車/自駕遊都好方便。阿姆斯特丹嘅Schipol Airport 即係歐洲重要國際機場之一，基本上飛去邊都冇問題！
5. 文青福地
荷蘭全國有接近440個博物館，唔少梗係國際知名嘅重點博物館，例如 Van Gogh Museum, Hermitage, Rijksmuseum 等等。各個地方亦都經常有唔同嘅文化藝術活動。
6. 多元化社會
荷蘭係歐洲裏面有最多國籍/種族嘅國家之一。無論你來自邊一個國家，呢度總會有你嘅「同鄉」社群。荷蘭亦都有唔少華人/香港人，海牙更係唔少華人聚居嘅地方！互相照應都容易啲呀嘛。
7. 自由度高
早係2000年，荷蘭已經將紅燈區、吸食大麻、同性戀婚姻等具爭議嘅議題合法化。好多人覺得「新奇」又或者會遭人側視嘅，係呢一邊一早已經見怪不怪。基本上只要你唔好影響到其他人，做咩都冇咩人會理。
8. 健康生活模式
荷蘭人大多數以單車代步，而且差唔多人人都會去健身室鍛鍊。足球、草地曲棍球、划艇等亦係荷蘭人熱愛嘅群體運動。喺呢度受到身邊嘅人耳濡目染，不自覺自己嘅生活模式都健康咗好多！
9. 生活質素高
Work life balance係荷蘭社會非常重視嘅元素。唔會好似香港咁，工時長、生活壓力大。好多當地人都非常重視運動、社交、娛樂等可以促進身心健康嘅活動。社會整體對心理健康嘅重視同埋意識到比一般亞洲地方強。喺呢邊生活絕對好寫意！
10. 可以做自己
講完以上九點，其實荷蘭最寶貴嘅地方，就係你可以做自己。相比起傳統亞洲社會，對於唔同嘅人有好多規範、枷鎖，生活喺荷蘭唔會感受到呢方面嘅限制。
今次講住咗多先！下一次就講吓「10個唔住荷蘭嘅理由 」😏 冇地方係完美嘅，有美好嘅嘢，就當然會有令人髮指嘅事情啦！
#荷蘭
#荷蘭生活
#歐洲
#歐洲生活
#海外職場
#香港人在歐洲
#香港人在荷蘭
Search